Crea sito

Leteradura

El lavorar plussee grand l’hann fait sora el Wikipedia. Num hem domà voltad la pajina cont una quai informazion plussee de alter sit o liber.

A’l principi

I prim tests scrivuds in volgar lombard tornen indree a’l secol qell del 13. Inn soratut ovre dedascalege de carater relijos. El esempi plussee ciar l’è el Sermon Divin del Peder de Barsegapè:

«No è cosa in sto mundo, tal è lla mia credença, ki se possa fenir, se no la se comença. Petro da Barsegapè si vol acomençare e per raxon ferire, segondo ke l ge pare. Ora omiunca homo intença e stia pur in pax, sed kel ne ge plaxe audire d’un bello sermon verax: cumtare eo se volio e trare per raxon una istoria veraxe de libri e de sermon, in la qual se conten guangii e anche pistore, e del novo e del vedre testamento de Criste.»
(Vers 1-10 del Sermon Divin)

La mancanza de ovre in lengua lombarda in qest period qì la g’ha de trovar-s ind la granda influenza qe i trovador ocitan g’haveven sora la leteradura a’l temp (tanti poeta dopraven la lengua d’oc). Qesta influenza la se po veder anca ind la lengua lombarda d’incœ, per esempi in una quai parolla (bofar, segador, cadrega, anciova, …).

El scritor plussee important del qell period qì a l’è el Bonvesin de la Riva, un fraa terzari milanes de l’orden dei Umiliads. L’ha scrivud un monton de componiments morai e dedascaleg, oltra qe el Liber dei Tre Scriture ind el qual se cunta de l’Infern, de la Passion del Cristo e del Paradis.

In nom de Jesu Criste e de sancta Maria
Quest’ovra al so honor acomenzadha sia:
Ki vol odir cuintar parol de baronia,
Sì olza e sì intenda per soa cortesia.
Odir e no intende negata zovarave,
E ki ben intendesse anc negata farave,
Ki no metess in ovra so k’el intenderave:

O l’om no mett lo cor e l’ingegn nient vare. […]»
(Bonvesin de la Riva, De scriptura nigra, vv. 1-8

In qest liber qì g’inn divers elements allegoreg e vœna dei prime introduzion leterarie del conterpass. Intra i soe ovre g’inn anca una quai su de la vita a Milan e un galatee. Dei alter poeta importants del temp a g’è el Jirard Pategg, el Ugucion de Lod, el Salimbene de Adam. A g’hem anca dei componiments anonim, tant ‘me la lodesana Lejenda de San Bassian.

 


Per saver-n plussee

Per un’antolojia in lengua lombarda podii visitar Antologia Lombarda.

Per veder la storia in detali podii andar sora la pajina Wikipedia.